Премиерот Христијан Мицкоски денес изјави дека надоместоците за „зелена нафта“ ќе продолжат да се доделуваат.
Тој ја потврди информацијата која неодамна ја објави и ресорниот министер Цветан Трипуновски, дека веќе се дистрибуираат ваучери за приближно 46 000 земјоделци. Како што изјави Мицкоски, одговарајќи на прашања од новинарите по поставувањето камен-темелник на Домот за стари лица во Зрновци, за оваа мерка се обезбедени 540 милиони денари. “Да, апсолутно. Како Влада имаме таква политика. Веќе е почнато делењето на ваучери за околу 46 000 земјоделци. Сумата за оваа поддршка е над половина милијарда денари, околу 540 милиони денари, министерот реферираше на последната владина седница дека делењето на ваучерите е почнато. Продолжуваме да ги поддржуваме земјоделците зашто тоа ни е најважно како Влада”, нагласи Мицкоски.
Тој се осврна и на откупот на грозјето, велејќи: “При крај е откупот на грозјето, се берат последните количини. Заклучно со вчера имавме околу 90 милиони килограми и ако на тоа се додаат 15 милиони килограми што ги имаат визбите, доаѓаме до 105 милиони. Очекуваме над 110 милиони килограми, имајќи предвид дека лани вкупната реколта беше 75 милиони. Сега имаме меѓу 35 и 45 милиони килограми повеќе грозје. очекувам и поголем прилив од извоз. Годинава повеќе се бараше белото гројзе, но и црното најде место во визбите. Пред да дојдам сега во Зрновци, бев во Чешпиново-Олблешево, разговарав со земјоделците”.
“Сега доаѓа на ред оризот, па јаболкото, тутунот… Имаме план, како завршуав една, почнува друга реколта, секако сите култури и земјоделците ни се во фокус”, истакна премиерот.
