Растот на индустриското производство во вториот квартал од околу 3,4 проценти е позитивен сигнал за состојбата во македонската економија, оцени премиерот Христијан Мицкоски на денешната прес-конференција, според кого податоците покажуваат дека состојбата е стабилизирана.
Одговарајќи на новинарско прашање, Мицкоски посочи дека особено значајно е што растот не се должи само на услужниот сектор, туку е забележан и кај преработувачката индустрија. објави Скопје1.мк
„Индустриското производство во овие услови е исклучително значаен податок и неговиот раст, посебно во вториот квартал кој што е над 3%, мислам дека е некаде околу 3,4%, но уште повеќе радува фактот што преработувачката индустрија расте“, рече Мицкоски.
Тој оцени дека овие показатели укажуваат оти по период од околу 24 до 26 месеци од мандатот на актуелната Влада, состојбата конечно е стабилизирана и дека во следниот период треба да продолжи развојот и растот.
„Овие индикатори се први индикатори коишто велат дека после овие 24, 25-26 месеци од оваа Влада конечно стигнуваат позитивни вести, односно да се изразам попрецизно, конечно е стабилизирана состојбата која што ќе треба да продолжиме да ја развиваме и да ја растеме“, нагласи премиерот.
Мицкоски изрази очекување позитивниот тренд да продолжи и во периодот што следува.
