За четири години изгубивме еден град со големина на Кавадарци или Кичево. Знаеме дека нема магично решение, но нашата борба е да ја вратиме вербата и тука сериозно размислуваме за дополнителни даноци за немажени и неженети. Во овие неколку реченици може да се срочи денешното обраќање на премиерот Христијан Мицкоски во Владата, во кое се осврна на демографијата во Македонија и нискиот наталитет.
Според премиерот, ова не е проблем само на Македонија, туку на многу држави во кои се раѓаат се помалку деца, населението старее, а младите се почесто бараат подобар живот надвор од границите.
Нагласувајќи дека ситуацијата е алармантна во Македонија, Мицкоски посочува на фактите дека во 2024 година се родиле 16.061 дете, а починале 20.201 лице, што е пад од 4.140 луѓе за само една година.
-Во последните четири години изгубивме повеќе од 33.000 жители, како да исчезна еден град со големина на Кавадарци или Кичево. Во многу општини и села веќе нема ниту прво одделение. Сè повеќе луѓе живеат сами. Сè помалку се женат, се помалку деца се раѓаат. Ова не се само бројки, ова е тишина што се шири – истакна премиерот.
Тој најавува борба со овој проблем, која, како што вели, е борба на сите нас.
-Затоа, нашата борба е да го направиме животот овде вреден; да го направиме мајчинството благослов, а не товар; да им дадеме на младите причина да останат; да изградиме институции што не ја трошат туѓата младост, туку ја негуваат; да изградиме држава во која надежта е поважна од пасошот. Знаеме дека нема магично решение. Но има намерна, постојана, државничка борба. И ние ја почнавме. Секоја мерка, секоја инвестиција, секоја политика што ја носиме е со цел да ја вратиме вербата. И тука сериозно размислуваме за дополнителни даноци за немажени и неженети – наведе премиерот.
Целото негово обраќање може да го прочитате тука.
