Премиерот Христијан Мицкоски денеска во Битола, на паркингот пред спортската сала „Боро Чурлевски“, ќе присуствува на презентација на дел од набавената опрема за управување со отпад (возила и контејнери/садови) наменета за општините од Пелагонискиот и Југозападниот регион.
Според информациите од владината прес-служба, оваа опрема претставува дел од ангажманот на Владата, Министерството за животна средина и просторно планирање и меѓународните соработници за усовршување на системот за стопанисување со отпад.
Со донираните возила, контејнери и садови за отпад од страна на Владата преку МЖСПП на јавните комунални претпријатија во овие општини, ќе се олесни и унапреди нивната оперативна дејност.
Воедно, Владата во соработка со локалните самоуправи во наредниот период ќе придонесе за подобрување на санитарните услови и заштита на животната средина.
„Исто така, се обезбедува: значително проширување на опфатот со услуги за собирање отпад во градски и рурални населени места, намалување на нелегалните депонии и несоодветно фрлање на отпадот, подобрени услови за селекција и подготвување за рециклирање (две бои на садови за собирање отпад, односно жолта боја за сува фракција и зелена за влажната – органска фракција) и подготовка на системот за целосно функционирање на идната регионална депонија во Новаци, односно центар за управување со отпад, како и претоварните станици во Кичево, Охрид, Прилеп и Дебар“, се наведува во соопштението.
