Младенци предизвикаа бурни реакции на социјалните мрежи откако во поканите за својата свадба побарале од гостите да платат по 75 долари за оброк на приемот. Случајот стана вирален откако еден корисник на Редит го сподели своето изненадување од, како што наведе, барањето на „близок“ пријател. Во објавата тој напиша дека во поканата стоела напомена: „За полесно да ги покриеме трошоците, љубезно ги молиме гостите да платат 75 долари по лице за својот оброк.“ Тој истакна дека бил изненаден, прашувајќи се од кога е прифатливо гостите да добиваат „сметка“ за присуство на свадба.
-Разбирам дека свадбите се скапи, но дали е ова нормално?“, праша тој, додавајќи дека не е навреден, туку едноставно не може финансиски да си дозволи дополнителен трошок.
Објавата предизвика илјадници реакции и коментари. Дел од корисниците оценија дека станува збор за нарушување на општествените норми и дека младенците не треба да организираат настан што не можат да си го дозволат. Други коментираа дека во таков случај не би донеле подарок или воопшто не би присуствувале.
Имаше и поумерени ставови, но преовладуваше мислењето дека барањето финансиско учество од гостите ја менува традиционалната улога на поканата и свадбениот прием. Случајот отвори голема дебата за растечките трошоци за свадби и за сè почестиот судир меѓу ограничените буџети, општествените очекувања и притисокот прославата да изгледа впечатливо, особено на социјалните мрежи.
Фото: Фрипик
