Синоќа на плоштадот во Могила, во присуство на бројни граѓани, партиски претставници и поддржувачи, се одржа промоцијата на кандидатот за градоначалник на ВМРО-ДПМНЕ, Драганчо Саботковски, кој доби поддршка за уште еден мандат на чело на Општина Могила.
На настанот присуствуваа генералниот секретар на ВМРО-ДПМНЕ, Ѓорѓија Сајкоски, пратеници, градоначалници, директори, ветерани, жени и млади од партијата, како и жители на општината. Во своето обраќање, Саботковски се осврна на постигнатото во изминатиот период, истакнувајќи дека заедно со граѓаните изградиле нова слика за Могила: стабилна, модерна и развојно ориентирана општина.
„Градевме, расчистувавме, се боревме со долгови и неправди. И никогаш не се откажавме. Могила денес е општина што чекори напред, со јасна визија и реални проекти“, рече Саботковски.
Тој потенцираше дека Општина Могила денес функционира стабилно, со над 80% исплатен долг што го наследил при преземањето на функцијата и дека со поддршка од новата влада предводена од ВМРО-ДПМНЕ веќе се реализираат значајни инфраструктурни и социјални проекти.
Во центарот на неговото обраќање беа капиталните инвестиции: асфалтирање на над 30 улици низ општината, изградба на водоводна мрежа во девет села, канализациони системи, уредување на индустриската зона „Петилеп“, како и реконструкција на училишта, спортски терени и изградба на првата градинка во Могила.
„Инфраструктурата не е само асфалт, таа е патот до подобар живот. Денес во Могила се гради повеќе од кога било. Со сопствени средства и со поддршка од Владата, реализираме проекти кои вистински го менуваат животот“, рече Саботковски.
Тој најави и нови мерки за поддршка на семејствата, младите и пензионерите, како и продолжување на политиките за поддршка на родителството и новите бракови, субвенции за енергетска ефикасност, инвестиции во животната средина и грижа за сите генерации преку проекти како „Грижа и нега во домот“.
Особено внимание беше посветено на земјоделството. Саботковски истакна дека со отворањето на две подрачни канцеларии на Министерството за земјоделство и Агенцијата за поттикнување на развојот на земјоделството, локалните земјоделци добиваат полесен пристап до услуги и информации.
Во своето обраќање, генералниот секретар на партијата, Ѓорѓија Сајкоски, порача дека ВМРО-ДПМНЕ продолжува со посветена, отчетна и домаќинска работа за сите граѓани.
„Саботковски има јасна визија, силен тим и докажани резултати. Со ваша поддршка, ќе продолжиме да ја водиме Могила по патот на развојот и успехот“, истакна Сајкоски.
Со порака дека „најдоброто допрва доаѓа“, Драганчо Саботковски побара доверба за втор мандат, ветувајќи дека Могила ќе остане општина што се развива со јасна насока и со слушнат глас на секој нејзин жител.
