По деновите посветени на разговори за одржливост и традиција, третиот ден на Fashion Weekend Skopje powered by UniBank, во просторот на Diamond of Skopje – Carat Office, го отвори своето највозбудливо поглавје – ден на идеи, панели и ревии што го дефинираат идниот правец на македонската модна сцена.
Дневната програма започна со панел-дискусијата „MISSION4WATER: Fashion, Innovation and Sustainability“, во рамки на европскиот проект IPA ADRION-Mission4Water, посветен на иновации, микропластика и одржливо управување со водните ресурси во модната индустрија.
Панелот, модериран од Наташа Сивевска (TTA-TC) и Блаже Јосифовски (Go Green), ги обедини експертите и претставниците на Politecnico di Milano, Hydro-Engineering Institute Sarajevo, PlanetCare, University of Zagreb, Business Accelerator UKIM и други организации од регионот. Фокусот беше ставен на третманот на отпадни води, микропластиката во синтетичките ткаенини и улогата на иновацијата во создавање поодржлива модна економија.
Публиката имаше можност да присуствува и на јавната панел-дискусија “Public Talk: Green and Sustainable Fashion”, модерирана од Катерина Илијовска (Yes for Less), која го обедини гласот на Нордиските и Балтичките амбасади, Модната асоцијација на Македонија и повеќе креативци и дизајнери од земјата и регионот.
Во рамки на панелот беше претставен проектот “Green and Sustainable Fashion – The Nordic-Baltic Story”, кој ќе се реализира во март 2026 година во нашата земја како резиденцијална програма за одржлив дизајн. Проектот е организиран од Нордиските и Балтичките амбасади во Скопје (Амбасадата на Шведска, Амбасадата на Литванија, Амбасадите на Данска, Финска и Норвешка) во соработка со Македонско Модно Здружение, со поддршка на Nordic Council of Ministers. Програмата има за цел да го приближи нордиско-балтичкиот пристап кон одржливата мода и да ги инспирира младите креатори од регионот кон позелена и поодговорна иднина. Настапија Јана Ѓорѓинска (Амбасада на Шведска) и Светлана Богова Јовановска (ММЗ).
Следеше разговорот „Vintage and Second-Hand Fashion: Trends in the Nordic-Baltic Region and North Macedonia“, на кој учествуваа Ирина Михајлова (Second Hand Faves) и амбасадорите на Шведска, Норвешка, Финска и Литванија, кои ги споделија своите перспективи за циркуларноста и реупотребата како современи вредности во модата.
Во делот „Social Sustainability and Empowerment through Design“, дизајнерката Ирина Тошева зборуваше за својата работа со жените во затворот во Идризово и за тоа како модниот дизајн може да стане алатка за достоинство и лична афирмација.
Презентацијата на проектот „The Bodyright – Own Your Body Online“ беше дел од јавната трибина посветена на подигнување на свеста за сајбер насилството врз жените и промовирање на телесната разновидност и прифаќање. Ангела Бикова, Паула Новела Гомез – заменик шеф на мисија при Амбасадата на Шпанија во Северна Македонија, и Афродита Шаља, раководителка на канцеларијата на УНФПА, ја претставија уникатната upcycled модна колекција создадена во дијалог со движењето Bodyright.
Официјалниот вечерен дел го отвори Амбасадорот на Кралството Шпанија, Н.Е. Рафаел Сориано Ортиз, а свое обраќање имаше и Афродита Шаља, Шефица на канцеларија на Фондот за население на Обединетите нации УНФПА во С. Македонија.
Ревиската програма ја отвори колекцијата “The Bodyright – Own Your Body Online” – копродукција на Ангела Бикова, Карол Фариас, Spanish Association for Sustainability, Innovation and Circularity in Fashion (SICModa) и креативната консултантка Палома Гарсија Лопез, визионерка и лидер на Circular Sustainable Fashion Week Madrid и Fashion Revolution Madrid. Колекцијата е создадена во дијалог со глобалното движење bodyright, под покровителство на UNFPA.
Поддржано од Амбасадата на Шпанија, UNFPA и FWSK, овој проект го отвори прашањето за правото на телото да биде свое без ограничувања на форма, големина или изглед. Колекцијата, создадена од рециклирани материјали, ја претвори борбата против сајбер насилството врз жени во естетска порака за почит, различност и лична автономија. На ревијата се појавија инклузивни модели, жени со различни способности, форми и приказни, кои ја направија пораката уште посилна: модата е простор каде секоја силуета има свое достоинство. Музиката за ревијата ја продуцираше Gloomie, создавајќи емотивен спој на македонски и шпански звук што ја заокружи приказната за единство, тело и слобода.
По овој значаен почеток, следуваше тивка и поетска приказна за минатото. Со “Winter Nostalgia”, Миријана Јосифоска, позната на модната јавност по нејзините шапки, на самиот почеток го најави своето ребрендирање во МIJА, а што а ја претвори зимата во топлина, вкус и мирис на сеќавање на детството, коледарските песни и семејната близина. Во нејзините длабоки шумски тонови, шесте препознатливи силуети (Classic, Monica, Anita, Linda, Charlotte и Sophia) беа омаж за домот и едноставната убавина на сезоната. Ова е моден израз што не зборува за трендови, туку за времето што тече и останува, истовремено.
Групната ревија ја внесе урбаната свежина на новата генерација дизајнери.
Со колекцијата “RED 01”, Марија Пољакова го дефинира својот урбан код – streetwear инспириран од македонската поетика, но преведен на јазикот на улицата: носливо, моќно и современо. Нејзините чисти линии и монохроматски композиции беа визуелна метафора за идентитет што расте во движење.
Miss Mila, пак, со “Mila’s Dream”, за прв пат доаѓа на FWSK. Таа ја однесе публиката во свет на гламур и фантазија. Вечерни фустани и со драма и со нежност, создадени за жени што не се плашат да сонуваат, ја впиша својата естетика во континуитетот на женственоста што трае.
Финалето на вечерта му припаѓаше на GEORGIYA, поддржана од ZIA Jewelry. Колекцијата “Season III” беше визуелен есеј за љубовта во сите нејзини облици – од копнеж до лекување. Чипка, рачни везови и сензибилна конструкција го вратија духот на македонската традиција, редизајнирана низ призмата на современата висока мода.
Во својата трета вечер, Fashion Weekend Skopje powered by UniBank уште еднаш потврди дека модата е повеќе од индустрија, таа е јазик на свеста, културата и човечката убавина.
Денес следува четвртиот ден, кој ќе го донесе креативниот пулс на студентските ревии и настапите на неколку познати македонски модни брендови.
Локација и партнери
Оваа година, Diamond of Skopje – Carat Office се претвори во вистинска модна лабораторија, каде што се спојуваат традицијата и иднината.
Генерален партнер е UNIBank, со поддршка на Министерството за култура и туризам, а проектот е реализиран со поддршка на партнерите:
Perwoll Renew, Martimex (со Michael Kors и Moschino), Pierre Cardin во соработка со СУГС „Димитар Влахов“, Венеција Мебел Прилеп, Eptisa, Green Land Group, Бадел, Musetticaffe, Пелистерка, Gemak, ZIA Jewelry, Аманти Паста, Bliss Hotel и Patty B Bags.
Фото: Ѓоргји Ристоски, Горан Бошковски
