Не секоја монета од едно евро има иста вредност. Постојат грешки при ковањето кои меѓу колекционерите можат да достигнат значителна цена. Еден таков пример е монетата од едно евро од Монако. На оваа конкретна монета од едно евро од Монако ѝ недостасува важен детаљ. Вообичаено, под ликот на принцот Алберт Втори се наоѓаат годината на изработка – 2007 и рогот на изобилство кој служи како ознака на кованицата.
„Меѓутоа, кај 2.291 примерок од оваа монета од 1 евро, корнукопијата недостасува. Секој што ќе пронајде ваква монета во својот паричник може да се смета за вистински среќник, бидејќи колекционерите се подготвени да платат и до 500 евра за оваа многу барана монета, напиша „Феникс магазин“.
Сепак, колекционерите аматери не треба премногу да се надеваат дека навистина ќе пронајдат ваква или слична грешка при ковањето. Според стручното здружение на германската трговија со монети, ваквите монети многу ретко стигнуваат во употреба. Една од познатите грешки е таканаречената ротација на матрицата.
Доколку задната страна на монетата е свртена наопаку, нејзината вредност може да достигне и до 200 евра. Друга ретка појава е неправилно обработена монета. Односно, ако дизајнот на монета од 2 евра биде искован на празна монета од 1 евро, вредноста на таквиот примерок може да порасне и до 650 евра. Колекционерите обрнуваат внимание и на таканаречениот ефект „пржено јајце“. Кај монетите од 1 и 2 евра, доколку внатрешното јадро е јајцевидно наместо кружно, цената може да достигне и до 100 евра.
„Пазарни цени од пет или дури шест броја се целосно нереални за грешки при ковањето“, се наведува на официјална веб-страница на стручното здружение.
Германските медиуми дополнително предупредуваат на претпазливост кога станува збор за онлајн огласи со претерано високи цени. Покрај тоа, монети што покажуваат нормални знаци на абење или само мали варијации при ковањето често се претставуваат како вредни кованички грешки.
„Со оглед на тоа што до денес во Европа се исковани повеќе од 150 милијарди евро-монети во оптек, помалите отстапувања се неизбежни“, велат од Бундес банка. Поради тоа, вистинските грешки при ковањето се исклучително ретки. Секој што навистина поседува монета од 1 евро од Монако на која ѝ недостасува рогот на изобилството има причина за задоволство, иако тоа сигурно нема да го направи богат.
Меѓу монетите од 1 евро кои се особено интересни за колекционерите се и оние од Сан Марино и Ватикан. Овие мали држави привлекуваат голем интерес бидејќи нивните монети најчесто се издаваат во ограничени количини и веднаш се издвојуваат во секоја колекција.
Миа
