Поп-пејачот Давид Темелков на 19 март ќе го одржи својот прв солистички концерт во Македонија. Концертот ќе се одржи во Македонски народен театар, со почеток од 20 часот, а ќе биде насловен „Мојата Македонија“.
Темелков на регионалната јавност и стана познат преку втората сезона на музичкото шоу Икс фактор во 2015 година, една година по победата на Даниел Кајмакоски во финалето во Белград. Тој студираше соло пеење на Факултетот за музичка уметност во Скопје, по што се пресели во Хрватска, каде што активно настапува и гради успешна кариера.
Негов најголем хит е песната „Мојата Македонија“, која за кратко време прерасна во емотивна химна за љубовта кон татковината. Во октомври 2025 година, Темелков го промовираше и синглот „Слушај животот штом диктира“, со кој го најави својот втор студиски албум, за кој најави дека ќе биде целосно кантавторски.
Иако живее и работи во Хрватска, Темелков никогаш не ја прекинал врската со Македонија. Преку видео-обраќање на социјалните мрежи, тој им се обрати на фановите со емотивна порака:
„Некои адреси не се забораваат, само почесто се сонуваат. А јас сонувам сеʼ да започне баш тука – дома, во Скопје. Драги мои Македонци, на 19-ти март мојот прв солистички концерт во Македонскиот народен театар. Ве чекам со песна, ве чекам со душа“.
Концертот најавува интимна атмосфера, силни балади и искрени интерпретации, а публиката може да очекува вечер исполнета со емоции, спомени и љубов кон Македонија.
Билетите се веќе во продажба онлајн преку seats.tix.mk и продажната мрежа, по цена од 1.500 денари за Партер, 1.500 денари за Галерија 1 и 1.200 денари за Галерија 2.
Фото: Фејсбук профил на Давид Темелков
