„МТЕЛ“ СУПЕР ЛИГА-МАЖИ: Пелистер максимално подготвен за гостувањето во Аеродром против актуелниот првак МЗТ Скопје

Вечерва од 19.часот, се игра дербито во салата „Јане Сандански“, а се сретнуваат екипите на МЗТ Скопје и Пелистер.

Домашните слават голем јубилеј, во СЦ „Јане Сандански“ во кој еден од најтрофејните клубови во нашата кошарка, екипата на МЗТ ќе го прослави својот голем јубилеј – 60. години од постоењето.

Она што е особено важно е што и двете екипи се во добра натпреварувачка форма, и зад себе имаат низа на победи кои ги поставија во оној горен дел од поредокот во „МТЕЛ“ Супер лигата. И аеродромци и битолчани бараат продолжување на победничката серија. Сериозен хендикеп за домашната екипа ќе биде неиграњето на Војдан Стојановски, која се пожали на повреда при настапот во репрезентативниот дрес, која ќе го одвои од овој дерби-меч.

„Одработевме квалитетно за време на репрезентативната пауза и сега се враќаме на завршницата од Супер-лигата. МЗТ Скопје е тим што апсолутно го респектираме, но како и секогаш досега – ние мораме да бидеме фокусирани на нашата игра, како во нападот така и во одбраната. Не верувам дека сме без шанси, напротив, ако одиграме онака како што знаеме и умееме би можеле да стигнеме до посакуваниот резултат. За тоа да се случи треба максимално да се одработи на терен сето она што ќе го имаме како „план за мечот“, да се одржи концентрацијата во текот на сите 40 минути. Кога играте против МЗТ мора да бидете перфектни од почеток до крај, доколку успееме во тоа можеме да парираме и да се надеваме на позитивен исход“, – истакнува тренерот на Пелистер – Боро Даскаловски.

Американецот во редовите на зелено-белите, Кевин Брејси Дејвис е максимално мотивиран за овој дерби натпревар, заедно со соиграчите да сторат се за да го изненадат МЗТ во Скопје.

„Верувам дека напредуваме како тим од натпревар во натпревар. Обрнуваме внимание на ситници во играта, повоиграни сме во одбраната, а во нападот подобро ја движиме топката. Мораме да продолжиме во ист стил и да веруваме дека можеме до добри резултати, продолжувајќи со мечот со МЗТ Скопје. Ќе играме со квалитетен ривал, најголема сила им е долгата клупа и ротацијата со квалитетни кошаркари на сите позиции во тимот. Тоа не значи дека се непобедливи, ние ќе мораме да одиграме паметно и ефективно, да ги користиме нашите шанси и верувам дека можеме да стигнеме до победата што сите ја посакуваме“, – изјави Брејси Дејвис.