Битолските „зелено-бели“ одиграа одлично второ полувреме во кое стигнаа до убедлива победа над МКК Куманово (92:62)
Кошаркарите на КК Пелистер во голем стил го одиграа вечерашниот дуел против МКК Куманово, декласирајќи го овој противник со огромни 30 поени разлика (92-62) во можеби најдоброто издание на „зелено-белите“ оваа натпреварувачка сезона.
„Пелистерци“ одиграа перфектно, дополнително мотивирани од куп-поразот од истиот ривал, па вечерва покажаа и квалитет и карактер што сигурно ќе ја зголеми самодовербата за клучниот дел од сезоната.
Противникот подобро го отвори натпреварот поведувајќи со 2-7, нешто подоцна и со 4-11, но „пелистерци“ не дозволија доминацијата на гостинот предолго да трае, па експресно се вратија во натпреварот. Џенкинс, Стајиќ и Митревски реализираа три напади во серија, се врати самодовербата меѓу „зелено-белите“ кои целосно се вратија во мечот, а на истекот на деветтата минута стигнаа и до првото водство, преку Малешевиќ за 23-22.
Првата четвртина заврши со 23-24, но Пелистер на самиот почеток од вториот период ја презеде контролата над резултатот. „Зелено-белите“ во неколку ситуации имаа четири поени предност, кумановци се враќаа, но „пелистерци“ подобро го завршија полувремето и со забивањето на Вилсон по генијалната асистенција на Стајиќ заминаа на одмор со предност од 44-39.
Првите две минути од втората четвртина не донесоа ниту поен на двете страни, пред Брејси Дејвис со тројка да донесе најубедливи 47-39 за Пелистер. Нападот повторно доби на сигурност, погодуваа сите играчи кои беа на теренот, па во 27. Минута преку Брејси Дејвис се стигна до првото двоцифрено водство (59-48). Доминацијата на битолчани продолжи, па по двете успешни положувања на Малешевиќ за 63-49 гостинскиот тренер Докузовски беше принуден да побара тајмаут, но Дејвис стави точка на оваа одлична четвртина за Пелистер (21-10) по која во последните десет минути се влезе со водство од убедливи 65-49.
Стрелците кај Пелистер ги предводеше Дејвис, кој реализираше 23.поени, Вилсон имаше 19, Малешевиќ постигна 18, Џенкинс 12, а Митревски уште 10.поени.
Кај гостите од Куманово: Радукиќ постигна 14.поени (седум асистенции и шест скока), а Ѓуроски додаде уште 10.поени.
Фото КК Плистер
