Досега 150 здравствени работници од земјава се пријавени да заминат во погодените места од земјотресот во Турција. Министерот за здравство Беким Сали изјави дека до 12 часот денеска ќе го имаат прелиминарниот список на доброволци, што ќе биде доставен во Центарот за управување со кризи, а потоа во координација со НАТО и турските власти ќе ги информираат за човечките и материјалните ресурси што се на располагање.
Понудени се и две комбиња, специјализирани за интензивна нега, добиени како донација за Клиниката за педијатрија. Тие две комбиња, комплетирани со два тима од доктор, шофер и медицинска сестра се подготвени да заминат до погодените места. Имаме и список на лекови што го обезбедивме преку компании и дарители и тие се ставени на располагање, а турските власти по потреба ќе одобрат што им е неопходно за да ги испратиме кон погодените места, изјави Сали.
Додава дека се подготвени да испратат помош, но се почитуваат сите протоколи за комуникација и чекаат одговор од Турција за тоа што им е потребно.
