Меѓународната агенција за енергија размислува за рекордно пуштање на стратегиски резерви нафта за да го стабилизира пазарот поради тензиите на Блискиот Исток.
Цените на нафтата продолжуваат да паѓаат на светските пазари откако се појавија информации дека International Energy Agency (ИЕА) разгледува рекордно ослободување на стратегиските резерви на нафта за да се стабилизира глобалниот енергетски пазар.
Според извештаи на меѓународните медиуми, предлогот се однесува на најголемото координирано пуштање на резерви во историјата на организацијата. Потегот доаѓа во време на зголемена нестабилност на пазарот предизвикана од воениот конфликт поврзан со Иран и нарушувањата во транспортот на нафта во регионот на Персискиот Залив.
По овие информации, цените на суровата нафта почнаа да се намалуваат. На меѓународните пазари, цената на референтната сорта Brent се спушти на околу 87 долари за барел, што претставува пад од околу 0,26 проценти во раното тргување.
Експертите оценуваат дека координираното пуштање на резерви е еден од инструментите со кои земјите се обидуваат да ја намалат нестабилноста на пазарот и да ги ограничат ценовните шокови предизвикани од геополитичките кризи.
Ченките на ИЕА располагаат со повеќе од 1,2 милијарди барели стратешки резерви, кои се чуваат како заштитен механизам во случај на глобални енергетски кризи или сериозни нарушувања во снабдувањето.
Вакви интервенции не се без преседан. Во 2022 година, земјите членки на ИЕА ослободија повеќе од 180 милиони барели нафта од резервите како одговор на енергетската криза по руската инвазија врз Украина, што тогаш беше најголемото координирано ослободување на резерви.
Сегашната иницијатива, доколку биде одобрена, би можела да го надмине и тој рекорд.
Нестабилноста на пазарот е тесно поврзана со ситуацијата на Блискиот Исток. Тензиите околу Ормускиот теснец – преку кој поминува околу 20 проценти од светската трговија со нафта – предизвикаа силни осцилации на цените во последните недели.
Аналитичарите предупредуваат дека пазарот на нафта останува исклучително чувствителен на геополитички настани и дека секоја нова ескалација во регионот може повторно да предизвика нагли ценовни скокови пренесува агротим.
