Есента е богата со сезонско овошје и зеленчук, идеални за подготовка на хранливи и вкусни јадења.
Есенската храна не само што е повкусна и подостапна во сезона, туку е богата со хранливи материи кои можат да ја збогатат нашата исхрана, тврди диететичарката Натали Ризо, која ја издвојува калинката како есенско суперовошје.
„Ова овошје е богато со влакна, витамин Ц, витамин К и фолати. Калинките содржат полифеноли, растителни соединенија кои помагаат во борбата против воспаленијата. Истражувањата покажуваат дека јадењето калинки може да го намали ризикот од дебелина, дијабетес и кардиоваскуларни болести“, посочува таа.
Покрај калинките, таа наведе уште неколку одлични есенски намирници.
Јаболка
Јаболката се богати со влакна и витамин Ц и помагаат во варењето и имунитетот.
„Ова разноврсно овошје може да се користи во многу слатки и солени јадења“, вели Ризо.
Тиква
„Тиквата е полна со бета-каротен, претходник на витаминот А, кој е добар за здравјето на очите и се бори против воспалението. Може да се користи во супи, колачи и појадок како каша и смути“, објаснува диететичарката.
Печурки
Иако печурките растат во текот на целата година, нивниот земјен вкус и месна текстура се особено добри за есенските јадења.
Ризо наведува: „Печурките се единствениот зеленчук кој содржи витамин Д, клучен за здравјето на коските, кој тешко се добива преку исхраната. Бидејќи витаминот Д е растворлив во масти, готвењето на печурките во маснотии, како што е маслиновото масло, ја подобрува неговата апсорпција.“
Круши
„Не само што крушите се разновидни и слатки, туку и се богати со влакна. Секоја круша содржи 20 отсто од препорачаната дневна количина на влакна, што е корисно бидејќи повеќето луѓе не добиваат доволно влакна.
Важно е да се јаде и кората бидејќи таа е најбогат извор на влакна“, тврди диететичарката.
Прокељ
„Прокељот станува сè попопуларен. Богат е со растителни влакна и витамин Ц, кој помага во одржување на здравјето на дигестивниот и имунолошкиот систем во постудените месеци. Лесно се пече и може да се служи како прилог или дури да стане главната состојка“, заклучува Ризо.
