Недостиг од кадар и застарена опрема ги попречуваат пожарникарите во справувањето со пожари.
Последната трагедија во Кочани, како и секојдневното соочување со летните пожари низ Македонија, повторно ги наметна прашањата околу подготвеноста на државата за ефикасна реакција при природни катастрофи. Недостигот на обучен кадар и старите возила – некои стари и до 40 години – остануваат најголемите слабости на противпожарната служба.
Често ги повторуваме истите грешки од минатото. Скопје традиционално бележи од 1.200 до речиси 2.000 пожари годишно, што укажува на отсутство на долгорочна стратегија. Со сериозен систем и јасна стратегија, институциите секоја година би ја намалувале оваа бројка преку воведување на соодветни мерки и задолженија за сите инволвирани.
Зоран Доревски, поранешен помошник министер во МВР
Јасно е дека се потребни суштински реформи за системот за заштита од пожари да стане функционален. Некогашните експерти предупредуваат дека целата организација треба да биде интегрирана и структурирана по јасна хиерархија – од раководството, преку командната структура, до оперативниот и теренскиот кадари.
Мора да се воспостави интегриран систем кој ќе функционира како пирамида, со јасно дефинирани надлежности од врвот до основата, односно до пожарникарските единици.
Владимир Симоновски, поранешен национален координатор за намалување на ризици
Во моментов, Македонија располага само со еден авијациски Ер-трактор, а се очекува набрзо да се вратат уште два од сервис. Командирот на главната противпожарна бригада во Скопје претходно предупреди дека е неопходно да се набават повеќе противпожарни возила за да се одговори на предизвиците.
Истражувањата на Центарот за граѓански комуникации откриваат дека државата има дефицит од 340 пожарникари. Најголем недостиг има во Скопје, а потоа следуваат Куманово, Битола, Тетово и Прилеп. Не е доволен ниту бројот на возила – дел од нив се постари од 27 години и се користат во градови како Крива Паланка, Валандово, Кратово и Старо Нагоричане. Општините што навреме ја сфатиле сериозноста на проблемот, набавиле нови возила, но тие сепак имаат просечна старост помеѓу 12 и 22 години.
