Царинската управа во јуни ја оствари највисоката месечна наплата на царински давачки во своето постоење, соопшти директорот Бобан Николовски на денешната прес-конференција во Владата.
Според него, заклучно со вчерашниот ден, во текот на јуни се наплатени 12,8 милијарди денари, што претставува нов рекорд и ја надминува досегашната највисока месечна наплата од 12,4 милијарди денари.
Николовски истакна дека позитивниот тренд продолжува и на кумулативно ниво. Во првите шест месеци од годинава, наплатата на царинските давачки е повисока за речиси 50 милиони евра во споредба со истиот период минатата година.
-Се трудиме максимално да ги затегнеме чешмите од сите страни и тоа се познава во континуитет. Само во јуни, во споредба со јуни 2025 година, наплатата е за нешто над 20 милиони евра поголема, што покажува дека сме на вистинскиот пат- изјави Николовски.
Директорот на Царинската управа ги презентираше резултатите по отчетот на министерката за финансии Гордана Димитриеска-Кочоска, која во Владата ги претстави резултатите од работата на Министерството за финансии и институциите што се во негов состав во изминатите две години пренесува слободен печат.
