Наскоро ни доаѓаат нови правила при патување во ЕУ. Истите стапуваат на сила на 12 октомври 2025 година, а од Министерството за внатрешни работи најавува дека граѓаните ќе бидат навремено информирани.
Патниците ќе пополнуваат онлајн апликации, важни две години, а целта е да се избегнат застои на патните премини.
Директорот на Бирото за јавна безбедност, Александар Јанев, посочи дека МВР е во постојана комуникација со европските партнери и се разговара на дневна основа со цел да биде олеснато и подостапно за македонските граѓани.
„Најголем проблем можат да бидат патните премини кај нашите соседи кои се дел од ЕУ. Затоа наша обврска е целосно да ги информираме граѓаните за тоа какви апликации треба да поднесат. Апликацијата ќе биде онлајн, ќе одзема кратко време и ќе има важност од две години. Кога ќе ги добиеме официјалните информации од ЕУ, тие ќе бидат споделени со граѓаните. Регулативата е на ЕУ и ние сме должни да ја почитуваме“, рече Јанев.
Според последните информации, системот за влез/излез (EES) ќе започне да се применува на 12 октомври 2025 година. Постепено, во период од шест месеци, системот ќе го имплементираат 29 европски земји – 25-те членки на ЕУ дел од Шенген зоната, плус Исланд, Лихтенштајн, Норвешка и Швајцарија. Целосната примена на системот ќе започне од 10 април 2026 година, од кога електронски ќе се пресметуваат деновите на престој.
