Нови тензии на Блискиот Исток повторно предизвикаа нестабилност на светските енергетски пазари, при што цената на суровата нафта бележи значителен раст, а азиските берзи денеска се отворија во негативна зона.
Цената на нафтата „Брент“ повторно се искачи над 95 долари за барел, додека американската сурова нафта надмина 91 долар за барел, објави 4news.mk Аналитичарите оценуваат дека пазарите реагираат на обновените тензии меѓу САД и Иран, како и на стравувањата од можна ескалација во регионот.
Клучните берзански индекси во Јужна Кореја, Хонг Конг и Австралија забележаа пад уште на отворањето на тргувањето, пренесува Индекс.хр. Трговците внимателно ја следат безбедносната состојба и информациите за судирите, кои се случуваат паралелно со разговорите за прекин на огнот меѓу Вашингтон и Техеран.
Дополнителна загриженост предизвикува и ситуацијата околу Ормускиот теснец – еден од најважните светски поморски правци за транспорт на нафта.
Според американски официјален претставник, американската војска во текот на ноќта извела нови напади врз воени локации во Иран, а биле соборени и четири ирански борбени дронови кои претставувале закана во близина на Ормускиот теснец пренесува 4њуз.
Неименуваниот претставник за агенцијата „Ројтерс“ изјавил дека во воздушен напад била погодена иранска копнена контролна станица во градот Бандар Абас, од каде што наводно требало да биде лансиран уште еден дрон.
– Овие акции беа внимателно одмерени, исклучиво одбранбени и имаа цел да го одржат примирјето – изјавил американскиот претставник, објави 4news.mk
Во меѓувреме, американскиот претседател Donald Trump ги отфрли тврдењата на иранските државни медиуми дека Иран и Оман ќе управуваат заеднички со сообраќајот низ Ормускиот теснец како дел од мировен договор со САД. Тој порача дека пловниот пат ќе остане отворен.
САД претходно извршија, како што наведоа, „одбранбени удари“ врз Иран, потег што Техеран го оцени како прекршување на примирјето кое е во сила од 8 април.
Од Централната команда на американската војска (CENTCOM) тогаш соопштија дека цел на нападите биле чамци кои се обидувале да постават мини, како и позиции за лансирање ракети кои претставувале закана за американските сили.
