Дизелот надолу, бензините нагоре. Регулаторна ги донесе новите цени на горивата. Од ноќеска дизелот поевтинува за два и пол, а бензините поскапуваат за два денари.
Ова следи по најавите од Владата дека трендовите на светските пазари ќе донесат вакви корекции, при што, според премиерот Мицкоски, државата со навремени мерки успева да ја задржи ценовната стабилност и да избегне поголеми шокови и покрај увезената енергетска криза и зголемената регионална побарувачка.
Тонско: Христијан Мицкоски – премиер
Од опозициската СДСМ велат, економската состојба се влошува,а владините политики не даваат резултати. Лидерот на партијата, Венко Филипче, на својот профил на Х порача дека народот никогаш не живеел полошо.
„Сега, кога граѓаните и работниците отворат фрижидер дома и кога ќе погледнат во паричникот, јасно гледаат каков е вистинскиот стандард со оваа криминална власт.
Народот никогаш не живеел полошо. Мицкоски сака да нè убеди дека сме „трета економија во Европа“… па тоа баш го гледаат граѓаните.“
Универзитетскиот професор Ванчо Узунов смета дека Владата прави погрешни проценки и дека реалната слика е поинаква кога цените на горивата ќе се споредат со куповната моќ на граѓаните. Ја повикува Владата да воведе таргетирани мерки за поддршка на ранливите категории граѓани, предупредувајќи дека токму тие најсилно ги чувствуваат ценовните удари од енергетската криза.
Во меѓувреме, граѓаните се жалат дека цените во продавниците континуирано растат, а секое поместување на цените на горивата дополнително го зголемува притисокот врз домашниот буџет. Сепак, од мелничко-пекарската индустрија засега се воздржани со конкретни оценки за влијанието на кризата.
Оттаму велат дека сè уште немаат направено детална анализа по најновите одлуки и чекаат заеднички став по состаноците со надлежните институции. Дел од производителите додаваат дека во моментов состојбата е стабилна, но неизвесноста околу тоа колку ќе трае кризата остава простор за загриженост во наредниот период.
