По повод Светската недела на детето, Ротари клуб Битола Пелистер подари нов голем ѕид-мурал во Зоолошката градина во Битола.
Во реализацијата на проектот учествуваа и децата од градинката „Мајски цвет“, кои со својата насмевка и искрена радост го збогатија овој настан. Промоцијата на муралот беше проследена со ден полн со дружба, креативност и пораки за човечност.
Муралот, покрај тоа што го разубавува просторот, претставува симбол на вредностите што ротаријанците ги негуваат и промовираат – хуманост, грижа за заедницата и поддршка за најмладите.
„Веруваме дека вистинската промена започнува со грижата за децата, тие се иднината на нашето општество и носители на надежта“, порачаа од Ротари клуб Битола Пелистер.
Со оваа иницијатива, клубот испраќа силна порака дека убавината, позитивната енергија и креативноста треба да бидат дел од секојдневието, особено за најмладите.
Муралот во Зоолошката градина ќе остане како траен подарок за сите генерации, потсетник дека светот станува подобар кога сите заедно вложуваме во иднината на децата.
Фото: Ротари клуб Битола Пелистер
