Со седум организирани и одржани концерти, Националната установа Камерен оркестар на Битола успешно ја реализиара програмата планирана за првите шест месеци од оваа година.
Од секторот за односи со јавност на институцијата, соопштија дека до крајот на годината ќе приредат уште 12 концерти.
-Сезоната беше отворена со традиционалниот концерт „Засекогаш во срцата“ посветен на Тоше Проески, а собраните средства веа донирани за настраданите во Кочани, во овој дел од годината се одржа „Романтична Едвардова вечер“, посветена на делата на Елгар и Григ, а на Велигден го реализиравме проектот „Премин 25“ на Горан Трајкоски во режија на Дејан Пројковски. Во текот на минатиот месец беше одржан и концертот „Ехо на единството“ под водство на маестро Евгениј Шчербаков, потсетија од НУ Камерен оркестар на Битола.
Првите шест месеци од оваа година, Оркестарот ги заокружи со концерт „Лауреатите на Пијанофест“, продолжи со „Подиум за млади“ – заеднички проект со Државното музичко училиште – Битола и заврши со „Концерт со двајца солисти“ каде беа исполнети оперски бисери под дирегентство на Владимир Димовски.
Од НУ Камерен оркестар на Битола нагласија дека сите класични концерти беа со бесплатен влез, со јасна цел, класичната музика да стане достапна за сите, без разлика на возраст, професија или предзнаење.
Фото: НУ Камерен оркестар на Битола
