Исланд е прогласена за најдобра земја за луѓето што сакаат да започнат нов живот во 2025 година, покажува големо меѓународно истражување. Оваа нордиска земја го зазеде првото место со вкупен резултат од 58,4 поени од можни 100.
Покрај природните чуда како глечери, гејзери и поларна светлина, Исланд се издвојува со висок животен стандард, безбедност и среќа на своите жители. Најновите ранг-листи дополнително го потврдуваат тоа: земјата е прогласена за најбезбедна во светот и се најде на третото место на листата со најсреќните земји во светот.
Рејкјавик, со околу 140.000 жители, нуди космополитска атмосфера, богата културна и гастрономска сцена, фестивали и урбан живот, истовремено задржувајќи го чувството на заедница и компактност.
Економските показатели дополнително ја зголемуваат привлечноста. Просечната плата на Исланд изнесува околу 4.500 евра, а стабилната економија и високото ниво на здравствена заштита ја прават една од најпосакуваните земји за живот и работа во Европа.
Меѓу десетте најпривлечни земји за имиграција доминираат европски држави: Швајцарија, Луксембург, Норвешка, Ирска, Данска и Холандија. САД се најдоа на 7. место, а Велика Британија на 19. место.
Во одделни категории се истакнаа и други земји: Јужна Кореја по квалитетот на здравствената заштита, Австралија веднаш зад неа, а Шри Ланка по образованието, благодарение на исклучително ниските трошоци за грижа за децата. Луксембург е оценет како најдобар по јавниот превоз, додека Обединетите Арапски Емирати се прогласени за најбезбедна земја.
