Во свет во кој речиси секое искуство постои само ако е забележано со камера, се појавува контракултурен тренд кој ја отфрла постојаната потреба за документирање. Клубовите без мобилни телефони, места каде што екраните се забранети или строго ограничени, стануваат сè попопуларни меѓу оние што бараат автентичен ноќен живот. Најновиот и можеби најамбициозниот пример доаѓа од Ибица, каде што летово се отвора „Ноктурна“, клуб кој сака да го редефинира начинот на кој ги доживуваме музиката и просторот.
Идејата за клуб без мобилни телефони на прв поглед изгледа радикална. Навикнати сме да ги снимаме диџеите, пријателите, па дури и сопствените танцови движења. Меѓутоа, токму таа навика постепено ја промени природата на излегувањето. Наместо да бидеме присутни, ние сме набљудувачи на сопствениот живот преку екран.
„Ноктурна“ се спротивставува на таа динамика. Со забраната за мобилни телефони, овој клуб сака да го врати фокусот на она што некогаш беше суштината на ноќниот живот: музиката, енергијата и меѓучовечката поврзаност.
„Ноктурна“ не е замислен како уште еден клуб на островот, туку како внимателно осмислено искуство. Проектот е резултат на соработката на две силни имиња во индустријата: „Концепт хотел груп“ и „Токио индустрис“. „Концепт хотел груп“ веќе управува со низа дизајнерски хотели на Ибица, познати по спојот на естетика и култура, додека „Токио индустрис“ носи меѓународно искуство со повеќе од 40 клуба и настани во светот.
Идејата е едноставна, но моќна – да се создаде место каде што сè што ви треба за совршен излез постои на едно место.
Се разбира, ваквиот концепт не е без предизвици. Многу посетители се навикнати да го документираат секој момент, а забраната за мобилни телефони може да предизвика отпор. Тука е и прашањето за безбедноста и логистиката, како да се организира вечер без дигитални карти, комуникација или фотографирање? Но, искуствата на другите клубови покажуваат дека со добра организација и јасна комуникација, публиката брзо се приспособува.
Можеби најважниот елемент на „Ноктурна“ е заедницата. Клубот сака да собере разновидна, културно ангажирана публика, луѓе кои доаѓаат заради музиката, а не заради социјалните мрежи.
Извор: Buro247.hr
Фото: Facebook
