Утринава, неколку минути пред седум часот, во Скопје пристигна возот од Битола.
Од денеска тој ќе биде единствениот што ќе го поврзува градот на конзулите со главниот град, по одлуката на МК Железници за редуцирање на линиите.. Воз од Скопје-Битола и обратно ќе има еднаш дневно. Во 3.13 часот ќе тргнува од Битола, и во 14.30 во спротивен правец.
Патниците кои ги затекнавме при излегувањето од возот, велат дека се разочарани за укинување на линиите, и патувањето сега дополнително им се отежнува.
„Ако не е тој воз, и ако го пропуштиме, ќе немаме друг како да си појдиме до Прилеп. Често патувам со воз, барем еднаш неделно или двапати. Ќе има сега потешкотии ама тоа е, што да се прави“.
„Во 3.13 минути тргнува од Битола. Повратен е во 14.30. Итна ни е работата, треба на клиники да одиме. Мораме со него да одиме и најефтино е. Ако свршиме работа ќе се вратиме, ако не, други средства ќе бараме“.
Ако порано железничкиот сообраќај во земјава бил главна сообраќајна артерија на народите од поранешна Југославија и претставувал гордост во Македонија, денес е фрлен на колена.
Имун на ваквите случувања не може да остане ни Борис Стојановски, кој повеќе од четири децении работел во МК Железници. Со тага во очите, раскажува за златните времиња на железничкиот транспорт во земјава.
„На времето имаше седум пара возови во еден правец. Од Скопје до Битола и обратно исто беа седум возови, од кои пет патнички и два брзи возови. Едниот беше наутро, од Љубљана за Битола, а другиот од Скопје за Битола. И сите беа максимално искористени. Наместо да се зголеми патничкиот сообраќај, ова е катастрофа. Луѓето од Азот и прилепскиот крај немаат никаков превоз освен воз. – Борис Стојановски – поранешен вработен во МК Железници.
Сега, единствени возови што остануваат во сообраќај се двата пара возови меѓу Скопје и Гевгелија, додека меѓу Скопје и Велес ќе има само шест пара возови дневно.
Пред неколку месеци пак, беа укинати сите четири пара возови на релација Скопје-Куманово-Табановце-Скопје, што ги револтираше жителите на кумановскиот крај, а со години нема возови за Кичево и Кочани.
