Швајцарците одлично го отворија натпреварот, особено во шутот за три поени. Погодија шест од првите седум обиди зад линијата за три поени и по неполни осум минути имаа висока предност од 27:12.
До крајот на првата четвртина постигнаа уште една тројка, па по десет минути игра Македонија заостануваше со 16:30.
Во вториот период Илија Коневски донесе дополнителна енергија во играта, особено во нападот. Нашиот бек за кратко време постигна 15 поени и помогна разликата да се намали на едноцифрена.
Во 16. минута Македонија заостануваше со девет поени (33:42), но Швајцарците одговорија со серија од осум поени и повторно се одлепија на 50:33.
На полувремето противникот имаше предност од 53:37.
А потоа следуваше вистинскиот пресврт.
На почетокот од второто полувреме повторно стигнавме до едноцифрена негатива. По поените на Александар Зунзуровски, Македонија намали на 44:53.
На средината од третата четвртина, Дион Шабани го постигна својот 11. поен за 50:59, а по одличната акција на Зунзуровски и играта „2+1“, Македонија стигна до 53:61. Нешто подоцна беше и 56:63.
Нашите кадети продолжија да притискаат и со фантастична завршница на третата четвртина направија целосен резултатски камбек. Во последните десет минути влегоа со само три поени негатива – 64:67.
Во последната четвртина ги „добивме“ и Зунзуровски и Шабани, токму кога беше најпотребно.
Израмнувањето стигна во 32. минута. Александар Котевски реализираше четири поени во низа за 70:70, а тоа беше само најава за комплетниот пресврт.
Македонија во последниот период одигра одлично, го наметна својот ритам и целосно ја презеде контролата над натпреварот. Во второто полувреме нашите кадети постигнаа дури 52 поени, а примија само 23, за голема победа од 89:76.
Ова е втора победа за Македонија на шампионатот, за скор 2-2 по четири одиграни натпревари.
Најефикасен во македонскиот состав беше Илија Коневски со 26 поени и шест скока. Александар Зунзуровски постигна 19 поени, со четири асистенции и три скока, додека Дион Шабани реализираше 18 поени, со шест скока и три асистенции.
Македонија утре го игра последниот натпревар од групната фаза. Противник ќе биде Украина, а дуелот започнува од 18:30 часот.
