Во Грција, во Солун официјално е регистриран првиот случај на респираторниот вирус ХМПВ, чие ширење предизвикува загриженост за нова здравствена криза.
Станува збор за 71-годишен маж чија ќерка за време на празниците отпатувала на одмор во Кина и неколку дена по враќањето таткото ги покажал првите симптоми и се лекува во болницата „Папаниколау“.
Пациентот прво бил однесен во приватна клиника, а потоа на 3 јануари беше примен во болницата „Папаниколау“ каде во саботата му е направен ПЦР тест и во понеделникот резултатите покажале дека тој е позитивен на ХМПВ вирусот.
Дотогаш мажот лежел на Клиниката за пнеуматологија со уште двајца пациенти, но штом се дознало дека се работи за вирусот бил префрлен во изолација додека пациентите и нивните роднини кои биле на истото одделение се известени дека не им се дозволени посети на болните.
Хуман метапневмовирус (ХМПВ) е респираторен вирус кој предизвикува симптоми слични на оние на обичната настинка и грип.
Иако болеста е обично блага, таа може да доведе до сериозни компликации како пневмонија, особено кај доенчиња, постари лица и луѓе со ослабен имунолошки систем.
Вирусот не е нов, но го предизвика интересот на властите поради порастот на случаите, особено кај децата под 14 години во северна Кина.
ХМПВ, првпат идентификуван во 2001 година, е едноверижен РНК вирус кој се шири преку респираторни капки или контакт со контаминирани површини.
Случаи претходно беа откриени во неколку земји, вклучително и во Велика Британија.
Симптоми вклучуваат кашлица, треска, назална конгестија и замор, со период на инкубација од три до шест дена.
За разлика од Ковид-19, не постои вакцина или специфичен антивирусен третман за ХМПВ. Третманот главно вклучува управување со симптомите.
