Од независната советничка група „Поинаку“ кои беа главни поборници да се реши проблемот со кучиња на хуман начин, велат дека со парите што се плаќаат за оштети, досега можеше да биде направен стационар. Со тоа ќе беа заштитени битолчани и немаше да се одлеваат пари за оштети.
„Прво добивме донација, изработен проект од битолска фирма врз основа на кој се доби одобрение за градба во 2022 година. Во буџетот за 2023 година беше предиведна целосната сума од 42 милиони денари за изградба на прифатилиште, но реалниот проект би бил околу 32 милиони денари. По ова, беше кажано во неколку наврати на неколку седници дека тоа се големи пари и дека нема да се реши проблемот со изградба на прифатилиште туку дека се ќе направи надворешниот дел со неколку боксови. Како може нешто што чини 4 милиони денари да го реши проблемот, а нешто што чини 40 милиони, иако сумата може да е и помала, да не го реши проблемот“,вели Габриела Илиевска од „Поинаку“.
Од Агенцијата за храна и втеринарство која треба да даде дозвола за прифатилиштето да проработи велат дека постапката е во тек.
Од Општина Битола соопштија дека прифатилиштето е во завршна фаза, а до отворањето економски оператор врши заловување и стручен третман на кучињата. Од ноември лани до февруари годинава заловени се 25 кучиња, а 23 се вратени на локацијата на заловување. Од Општината додаваат дека од Агенцијата извршен е увид, по што извршено е отстранување на забелешките и целиот процес се очекува да биде завршен многу брзо.
„Просториите за држење и сместување на кучињата се состојат од 22 боксови за поединечно и групно сместување и држење на кучињата. Во секој бокс секое куче има на располагање куќарка или лежиште за спиење. Во еден бокс може да се сместат најмногу две компатибилни кучиња. Максималниот капацитет на боксовите за држење е 44 кучиња. Ова е транзитно прифатилиште, а целта е на овој начин да третира минимум 75 проценти од уличните кучињата во рамките на шест до осум месеци, по што ќе отпочне нов период за третман на минимум 75 проценти од преостанатиате кучиња“, велат од Општина Битола.
Во државата има 27 прифатилишта за улични кучиња, со најголем капацитет за згрижување на 140 кучња е ЈП „Лајка“ од Скопје.
Извор: СДК
