Општина Битола ја информира јавноста дека ќе изработи нова спомен-плоча посветена на револуционерот Александар Турунџев, откако во јавноста се појавија реакции за визуелниот изглед на користениот фонт на постоечката плоча.
Граѓаните изразија забелешки дека буквите на плочата изгледаат како да се напишани со туѓа ортографија, односно дека не соодветствуваат на стандардната македонска кирилица. Стручната лингвистичка анализа сепак утврди дека не станува збор за неправилен јазичен израз, туку за декоративно типографско решение, каде некои форми наликуваат на латинични букви, што создава визуелна забуна.
Имајќи ја предвид чувствителноста на јазичните прашања и важноста на јазикот и писмото како дел од националниот идентитет, Општина Битола ќе постави нова спомен-плоча со современ македонски фонт, целосно усогласен со правописните норми на македонскиот литературен јазик.
„Целта е да се избегнат идни недоразбирања и да се обезбеди јасна и прецизна јазична форма, како што прилега на јавни обележја што ја чуваат историската меморија“, истакнуваат од Општината.
Општина Битола останува посветена на негувањето на јазичната исправност, зачувувањето на културната традиција и достоинственото одбележување на хероите кои се вградиле во слободата на Македонија.
