Општина Новаци денес официјално ги потпиша решенијата за исплата на субвенциите за возачки дозволи од Б категорија за сите млади лица до 26 години кои аплицираа согласно јавниот повик објавен претходно оваа година.
Секој од одобрените апликанти ќе добие финансиска поддршка во износ од 10.000 денари, мерка која има за цел да ја поттикне мобилноста на младите, да ги намали нивните трошоци и да им помогне полесно да ги исполнат образовните, работните и секојдневните обврски.
Градоначалникот на Општина Новаци, Стевче Стевановски, истакна дека оваа мерка е дел од континуираната локална политика за поддршка на младите и вложување во нивната иднина.
„Со оваа мерка продолжуваме да инвестираме во младите луѓе во нивната иднина, независност и развој. Горди сме што Општина Новаци е општина која ги препознава и поддржува потребите на младата генерација и ќе продолжиме да работиме на нови програми и можности“, порача Стевановски.
Стевановски додава дека Општина Новаци останува посветена на креирање услови кои ќе овозможат поголема активност, мобилност и ангажман на младите во локалната заедница.
