Со свечен настан, Општинскиот комитет на ВМРО ДПМНЕ Битола синоќа одбележа 36 години од своето формирање. На одбележувањето присуствуваше претседателот на ВМРО ДПМНЕ и претседател на Владата, проф. д-р Христијан Мицкоски, заедно со партиски функционери, членови, ветерани, Унијата на млади сили, Унијата на жени и бројни поддржувачи.
Во своето обраќање, претседателот на ВМРО ДПМНЕ, проф. д-р Христијан Мицкоски, истакна дека силата на партијата отсекогаш произлегувала од нејзиното единство и довербата што ја добива од граѓаните.
„Ако постои една лекција што ја научивме низ сите изминати години, тогаш тоа е дека ВМРО ДПМНЕ е најсилно кога е обединето. Ниту една функција, ниту една позиција и ниту едно лично несогласување не може да биде поважно од довербата што ни ја дава народот. Нашата сила никогаш не била во поединците, туку во заедништвото и чувството дека припаѓаме на нешто поголемо од нас самите“, порача Мицкоски.
Тој нагласи дека довербата од граѓаните е обврска која мора да се оправда со конкретни резултати.
„Нашата победа има вистинска смисла само ако ја претвориме во подобар живот за граѓаните во нови работни места, повисоки плати и пензии, подобро здравство и образование, посилни институции и држава во која успехот зависи од трудот, знаењето и чесноста. Нашите најдобри денови не се зад нас, туку пред нас, доколку останеме блиску до народот и секоја победа ја сфатиме како нова обврска“, истакна Мицкоски.
Пред присутните се обрати и претседателот на ОК ВМРО ДПМНЕ Битола, Горан Исков, кој потенцираше дека битолскиот општински комитет е еден од најсилните во државата и дека секогаш знаел да одговори во клучните моменти.
„Општинскиот комитет на ВМРО ДПМНЕ Битола е еден од најсилните во државава, секогаш подготвен да го препознава вистинскиот момент со точна реакција во клучните и пресудни битки. Пораката што вечерва ја испрати претседателот на ВМРО ДПМНЕ, проф. д-р Христијан Мицкоски, уште еднаш ја потврди важноста на Битола и силата што ОК ВМРО ДПМНЕ ја има секогаш кога е најпотребно“, рече Исков.
Тој нагласи дека Општинскиот комитет ќе остане целосно посветен на новата визија за развој на Битола и ќе воспостави уште поблиска комуникација со граѓаните.
„ВМРО ДПМНЕ е посветено на новата визија за Битола и нејзините граѓани. Ќе бидеме постојано присутни меѓу граѓаните и упатувам јавна отворена понуда за соработка со сите. Ќе ги користиме сите современи начини на работа, затоа што денес политиката бара нов и поинаков пристап, брза реакција, непосредност и лидерство“, порача Исков.
Свеченоста заврши со порака за единство, продолжување на заедничката работа и нови успеси за ВМРО ДПМНЕ, Битола и Македонија.
Фото: Фејсбук профил на Христијан Мицкоски
