Кога температурите надминуваат 30 степени, многумина бараат ладни пијалаци што брзо освежуваат и ја гасат жедта. Токму затоа оваа лимонада станува сè попопуларен избор во летниот период.
Станува збор за варијација на лимонада која во последно време добива голема популарност ширум светот и тоа со добра причина. Освен што е едноставна за подготовка, оваа турска лимонада се издвојува по својот богат вкус и силна арома, а во неа се додава и една неочекувана „тајна“ состојка – кората од лимон.
Иако се користат истите основни состојки како кај класичната лимонада, разликата е во начинот на подготовка. Во турската верзија се користи и жолтиот дел од кората на лимонот, каде што се наоѓаат етерични масла кои ѝ даваат посилен мирис и поинтензивен вкус.
Состојки
– 5 непрскани лимони
– 2 чаши шеќер
– 4 литри ладна вода
Подготовка
Лимоните добро се мијат, а потоа се ренда само жолтиот дел од кората, внимавајќи да не се зафати белиот дел, бидејќи тој дава горчина. Ренданата кора се меша со шеќер и се остава да стои 15 до 20 минути, за шеќерот да ги извлече етеричните масла и аромата.
Потоа се цеди сокот од лимоните и се додава во смесата со шеќер и кора. Се преливаат два литра ладна вода, добро се промешува и смесата се става во фрижидер неколку часа за вкусовите да се соединат.
Кога напитокот ќе се излади, се процедува низ густа цедалка или газа, се додаваат уште два литра вода и повторно се промешува. Се служи добро изладена, со коцки мраз, парчиња лимон и по желба листови свежо нане.
Зошто оваа лимонада е посебна?
Кората од лимон игра клучна улога бидејќи содржи големо количество етерични масла кои му даваат на напитокот побогат и поизразен вкус од класичната лимонада направена само од сок.
Сепак, важно е да се внимава при подготовката. Ако се изренда и белиот дел од кората или ако смесата стои предолго, лимонадата може да добие непријатна горчина. Затоа се препорачува да се користи само тенок жолт слој од кората и да се почитува времето на стоење.
