Руската рубља денеска падна на најниската вредност од првите недели од војната во Украина, бидејќи Москва ги зголемува воените трошоци и санкциите на Западот го оптоваруваат нејзиниот извоз на енергија.
Доларот утрово вредеше 101 рубља, па продолжува падот на вредноста на руската валута за повеќе од 25 отсто во однос на почетокот на годината. Ова е најниската вредност на рубљата во последните 17 месеци.
Економскиот советник на претседателот Владимир Путин, Максим Орешкин денеска во авторски текст за државната новинска агенција Тасс ја обвини „лабавата монетарна политика“ за слабата рубља. Орешкин тврди дека силната рубља е во интерес на руската економија и дека слабата валута „го отежнува економското преструктуирање и негативно влијае на реалните приходи на луѓето“.
Заменик-претседателот на Централната банка на Руската Федерација Алексеј Заботкин во петокот изјави дека регулаторот не гледа ризици за финансиската стабилност поради падот на рубљата.
Според него, „одлучувачки фактор“ во она што се случува со рубљата се извозно-увозните операции, а не одливот на капитал, кој од почетокот на војната надмина 250 милијарди долари.
