Осум регистрирани случаи на западнонилска треска во Северна Македонија сами по себе не претставуваат причина за паника.
Но, тие се причина за внимание.
Токму тоа е пораката што деновиве ја испратија епидемиолозите, откако Институтот за јавно здравје соопшти дека годинава се регистрирани осум случаи на заболувањето, од кои седум се лабораториски потврдени, а еден е класифициран како веројатен. Сите заболени развиле потешка, невроинвазивна форма на инфекцијата и биле хоспитализирани.
Професорот Драган Даниловски предупреди дека овие осум случаи не треба да се сфатат како вкупниот број заразени.
„Ова е видливиот врв на една епидемиолошка санта мраз“, изјави Даниловски, укажувајќи дека зад секој потврден тежок случај може да стојат десетици, па и стотици лица кои биле заразени без да знаат, бидејќи кај нив инфекцијата поминала без симптоми или со лесна клиничка слика. (изјава пренесена од Time.mk)
Бројките што не се гледаат
Ова предупредување не е шпекулација, туку се темели на добро познати епидемиолошки карактеристики на вирусот Западен Нил.
Според медицинските податоци, околу 80 проценти од заразените немаат никакви симптоми, додека кај приближно 20 проценти се развива полесна форма со температура, главоболка, болки во мускулите и малаксаност. Помалку од еден процент развиваат тешка невроинвазивна форма, со менингитис или енцефалит, која најчесто бара болничко лекување.
Тоа значи дека регистрираните пациенти не ја претставуваат целосната слика за циркулацијата на вирусот.
Напротив, тие најчесто се првиот сигнал дека вирусот веќе извесно време е присутен во средината.
Извор: Рацин
