Во фоајето на НУ Центар за култура – Битола, на 14 август 2025 година, беше отворено тринаесеттото издание на традиционалната фотографска изложба „Со љубов од Битола“. Оваа година, темата беше посветена на битолските порти – симболи на минатото и чувари на градскиот дух.
Изложбата, која е дел од фестивалот „Бит Фест 2025“ и е финансиски поддржана од Министерството за култура и Општина Битола, претставува 33 фотографии. Од нив, 30 се од автори кои учествувале на конкурсот, а три се дела на членовите на стручното жири: Димитар Чунговски, Кети Талевска Бакревска и Диоген Хаџи-Коста Милевски.
Првото место го освои Марија Дојшовска со фотографијата „Староградска порта“, второто место му припадна на Давид Козаров со „216“, а третата награда ја доби Викторија Стојковска со делото „Вдахнување“. Доделени беа и три пофалници за автори кои на посебен начин ја доловиле убавината на битолските порти.
Директорот на НУ Центар за култура, Сашо Илковски, во своето обраќање истакна дека изложбата претставува „ризница на спомени и емоции, дигитална библиотека која ја чува душата на градот“. Координаторот на проектот и член на жирито, Диоген Хаџи-Коста Милевски, нагласи дека овогодинешното издание е рекордно според бројот на учесници и квалитетот на пристигнатите фотографии.
Изложбата нуди патување низ портите на Битола – неми сведоци на историјата и чувари на тајните на градот. Таа ќе биде отворена за посетителите во наредните денови во фоајето на НУ Центар за култура.
Фото: Општина Битола
