Откупната цена на тутунот за оваа година покажува значителен пад во споредба со минатата година, предизвикувајќи незадоволство кај тутунопроизводителите. Податоците за оваа година, презентирани од ресорниот министер Љупчо Трипуновски, покажуваат дека цените се поставени на 375 денари за прва класа, 300 денари за втора класа, 240 денари за трета класа, додека дополнителната класа е проценета на 115 денари по килограм.
Ова е значително пониско во однос на претходната година, кога тутунарите добиваа значително повисоки суми благодарение на линеарната субвенција од 100 денари по килограм, воведена од претходната Влада.
Покрај падот на основната откупна цена, намалени се и субвенциите.
Наместо линеарниот модел од 100 денари по килограм за сите класи, годинава субвенциите се распределени по класи: 80 денари за прва класа, 70 денари за втора класа и 60 денари за трета класа. Овој пристап дополнително го намалува приходот на тутунарите, кои веќе се соочуваат со зголемени производствени трошоци. Оваа промена предизвикува револт, бидејќи значи дека производителите ќе добијат помалку пари за својот труд, во период кога секој денар е критичен за нивното опстанување.
До оваа година тутунопроизводителите уживаа повисоки откупни цени и стабилни субвенции. Примерот со првата класа, која минатата година достигна над 460 денари по килограм, покажува како правилната субвенциска политика и елиминацијата на одбитоците влијаеше позитивно врз приходите на земјоделците. Според достапните податоци, од 2014 до 2023 година, цената на тутунот се зголемила за 212%.
Дополнително, како и другите земјоделци така и тутунарите ги користат бенефициите од зелена нафта и финансиска помош за обработливите површини кои се воведоапред две години. Овие мерки помогнаа во обезбедување на стабилност за оваа важна земјоделска гранка, која носи девизен прилив од над 120 милиони евра годишно.
Падот на откупната цена на тутунот во 2024 година е сериозен удар врз семејствата кои егзистираат од ова производство. Во Македонија ма околу 20.000 семејства кои живеат од приходот од производство на тутун.
