Американските берзански индекси завршија во минус синоќа под притисок на загубите во технолошкиот сектор и акциите на компаниите поврзани со вештачката интелигенција (ВИ). Дополнителен притисок врз инвеститорите создадоа најновите податоци за инфлацијата во САД, која во септември ги надмина очекувањата на економистите.
Индексот S&P 500 падна за 1,11 проценти, технолошкиот Насдаг/Nasdaq загуби 1,88 проценти, додека Доу Џонс/Dow Jones забележа пад од 0,09 проценти. Падот на Насгад беше најголем од јули, покажуваат пазарните податоци. Според податоците објавени во САД, потрошувачките цени во септември пораснале за 0,6 проценти на месечно ниво, додека годишната инфлација достигнала 3,7 проценти, над очекуваните 3,6 проценти. Овие резултати ги засилија очекувањата дека Федералните резерви би можеле повторно да ги зголемат каматните стапки, што би ги поскапило кредитите за компаниите и би ги ограничило инвестициите- пишува Инвестинг.
Најголемите загуби ги претрпеа дел од компаниите поврзани со развојот на вештачката интелигенција. Акциите на операторот на центри за податоци CoreWeave паднаа за околу 15 проценти, додека Оракл/ Oracle загуби речиси девет проценти. Под притисок беа и производителите на компјутерска опрема и полупроводници, меѓу кои Дел/Dell и АМД/AMD.
Инвеститорите сè повеќе ги преиспитуваат трошоците и задолжувањето на компаниите што вложуваат големи суми во инфраструктура за вештачка интелигенција, особено во услови на повисоки каматни стапки. Во финансискиот сектор, акциите на Банк оф Америка/Bank of America паднаа за околу пет проценти по објавувањето на кварталните резултати и по веста за регулаторна казна од 1,2 милијарди долари. Акциите на Morgan Stanley исто така завршија во минус, и покрај резултатите што ги надминаа очекувањата на аналитичарите.
Падот на американските берзи покажува дека комбинацијата од повисока инфлација, неизвесност околу каматните стапки и растечките трошоци за развој на вештачката интелигенција повторно ги прави инвеститорите повнимателни пренесува слободен печат.

