Благ пад на каматните стапки кај вкупните кредити и стабилизација на депозитите бележат најновите статистички податоци за јуни 2026 година што ги објави Народната банка. Според извештајот, просечната каматна стапка на вкупните кредити на годишна основа бележи намалување од 0,36 процентни поени, додека кај вкупните депозити е регистрирано минимално годишно намалување од 0,03 процентни поени.
Во периодот опфатен со најновата анализа, финансиските индикатори покажуваат различни движења во зависност од секторите и видовите на пласмани.
„Во јуни 2026 година, просечната каматна стапка на вкупните кредити изнесува 4,67% и е намалена на месечна и на годишна основа за 0,02 п.п. и 0,36 п.п., соодветно. Просечната каматна стапка на вкупните депозити се задржа на нивото од претходниот месец и изнесува 2,17%. На годишна основа, просечната каматна стапка на вкупните депозити е пониска за 0,03 п.п.“
Во делот на новоодобрените финансиски производи, статистиката покажува дека просечната каматна стапка на новоодобрените кредити во јуни изнесува 4,38%, бележејќи месечно и годишно намалување од по 0,04 процентни поени. Од друга страна, новопримените депозити остварија раст на месечна и годишна основа.
„Во јуни, просечната каматна стапка на новоодобрените кредити на домаќинствата оствари месечен раст од 0,07 п.п. и изнесува 4,71%. Зголемувањето произлегува од повисоките каматни стапки на кредитите во странска валута и каматните стапки на денарските кредити без валутна клаузула (за 0,13 п.п. и 0,02 п.п., соодветно), при забележан пад на каматните стапки на денарските кредити со валутна клаузула (за 0,06 п.п.). Анализирано на годишна основа, оваа каматна стапка е повисока за 0,02 п.п.“
