Првоосомничениот за убиството на 14-годишната Вања Ѓорчевска и 74-годишниот Панче Жежоски, Љупчо Палевски попознат како Палчо, по екстрадицијата која беше изведена вчера, поминал мирна ноќ во затворот Скопје, познат како Шутка.
Тој не се жалел за здравствени проблеми, но сега следува детален здравствен преглед со цел да се види дали лицето има некакви здравствени проблеми.
Според информациите, Палевски се уште не добил затворски комбинезон и нова фризура односно избричена глава, како што тоа веднаш беше направено со другите осомничени за овие убиства по нивното апсење.
На него му било оставена хартија и пенкало, во случај да има некаква молба, нешто што се прави како и со секој друг притвореник.
Како што вчера пишуваше ТВ21, тој ќе биде сместен во посебна соба, кон која се доаѓа по посебен ходник.
Него ќе му биде и храната проверувана поради безбедносен ризик.
Засега не е познато дали Палевски побарал адвокат.
Тој во текот на вчерашниот ден беше екстрадиран од Република Турција со редовен лет на „Туркиш Ерлајнс“.
