Пелистер и Силекс одиграа 0:0 во дуелот од претпоследното 21. коло на ПМФЛ.
Домашните оптоварени од психолошката важност на мечот кој има свое влијание во борбата за опстанок, фрлија сѐ на картата да направат почетен притисок и да постигнат брз гол со кој би го скршиле отпорот на гостите, за кои овој меч не носеше посебна резултатска мотивација.
Сосема спротивно, тие покажаа сила да одолеат на првичниот притисок, а во вториот дел ја преземаа иницијативата и почнаа да создаваат шанси за гол.
Во првиот дел имаа два сериозни обиди за домашните најпрво Булатовиќ со глава, а вториот по асистенцијата на Бошковски, но непрецизно. Ангелевски се обиде соло продор, но успеа да изнуди само корнер по шутот по средина на шеснаесетникот. Васоски направи повеќе измени во вториот дел и Силекс „живна“ заканувајќи се сериозно во 62 минута, кога Мирчевски имаше ситуација да го отвори резултатот, но голманот Јовчевски покажа и храброст и зрелост, па со својата интервенција ја сочува мрежата.
Иницијатива донесе нова шанса во 82 минута, кога Мигуел Пиреш во опасен контра напад продолжи сам очекувајќи пенал поради парадата на Јовчевски, но факт е дека на спротивната страна имаше слободни соиграчи кои можеа да реализираат.
Битолчани успешно парираа на уште еден тим од „големата четворка“, за разлика од претходниот дуел со Шкендија во Тетово, изостанаа шансите во второто полувреме. По корнерот на Србијанац еден непрецизен удар на Керим само измами воздишки, а исто така и едно успешно проигрување од Гроздановски во 84 минута остана без соодветна реализација. На самиот крај, Силекс изнуди неколку корнери, но изостанаа шансите за гол.
Силекс со овој бод има 39 поени и останува на четвртата позиција.
Пелистер со 21 поен останува во последните три на дното на табелата, со Македонија ЃП и Арсими како директни ривали во борбата за опстанокот.
Во 22 коло Пелистер ќе гостува кај Тиквеш, додека Силекс е домаќин на Вардар.
