Пратеникот од ВМРО-ДПМНЕ и претседател на ОК ВМРО-ДПМНЕ Битола, Пеце Милевски, изјави дека актуелната Влада за прв пат обезбедува вистински рамномерен регионален развој, при што подеднакво се поддржуваат сите општини во државата.
Милевски истакна дека Битола од двата јавни повици добила вкупно 80 проекти во вредност од 15 милиони евра, што, како што посочи, ќе овозможи финализирање на повеќе значајни инфраструктурни зафати, меѓу кои и новата Пречистителна станица.
„Во само два буџета, оваа Влада инвестираше над 60 милиони евра во Битола“, нагласи Милевски, додавајќи дека крупни инвестиции се очекуваат и во изградбата на автопатот Битола – Прилеп, проект кој, според него, е од огромно значење и за економскиот развој и за безбедноста на граѓаните во регионот.
Тој потсети дека ситуацијата не била иста во 2024 година, кога, како што рече, ребалансот на тогашната влада бил оценет со „нула“ од граѓаните, поради високата корупција и погрешните економски политики.
Милевски додаде дека со ребалансот во 2024 година и Буџетот за 2025 година бил надминат тежок период на стабилизација на државата, а денес веќе се влегува во фаза на посилен развој.
Во новиот предлог-буџет, како што информира Милевски, особено внимание е посветено на мерките за намалување на сивата економија и зголемување на наплатата на буџетските приходи.
Фото: Принтскрин
