Во насока на зајакнување на заштитата од шумски пожари и зачувување на природното богатство на Пелистер, денес беше потпишан Меморандум за соработка меѓу Јавната установа Национален парк Пелистер и планинарските друштва од Битола.
Со овој документ, планинарите се обврзуваат на континуирана соработка со ренџерската служба на паркот, со навремено евидентирање и пријавување на сите случаи на несовесно однесување во природата.
Од 1 јули до 31 август 2025 година, согласно Законот за шуми, се воведува целосна забрана за движење во шумите на територијата на паркот, освен за лица со писмено одобрение и планинарски друштва со посебна дозвола.
Меморандумот вклучува повеќе цели: заштита од шумски пожари, одржување на чистота и ред во природата, контролирано движење по обележани патеки како и навремено пријавување на сомнителни активности.
„Пелистер е наше заедничко богатство – нека го чуваме заедно!“, апелираат од Националниот паркПелистер.
Доколку забележите пожар, отпадоци или сомнителни активности, јавете се веднаш на следните броеви: Пелистер/Вртушка: 070 281 300 / 071 235 972 / 075 237 267 / 071 401 977; Брајчино: 072 312 215.
Фото: ЈУ Н.П. Пелистер
