ФК Шкендија ја бара четврта последователна победа за да остане единствениот тим со максимален ефект на стартот од новата сезона. По двата меча зад затворени врати, „црвено-црните“ конечно го пречекуваат својот 12-ти играч на трибините. Брзото крило Ване Крстевски е оптимист пред претстојната пресметка против Струга Трим Лум.
„Се подготвуваме чекор по чекор за Струга, знаеме дека нè очекува силен дуел и добро го анализиравме ривалот. Започнавме одлично со три победи и се надеваме дека ќе врземе уште една, што е и нормално. Мислам дека настапите во Европа малку нè исцрпија. Сега сме целосно фокусирани на првенството и се надеваме дека ќе ја освоиме титулата оваа година, за следното лето да бидеме уште подобри во Европа“, истакна Ване Крстевски.
Откако ја заврши казната од два меча без публика поради инцидентите во купот, тетовци конечно ќе играат во вистинска фудбалска атмосфера.
„Голема предност и привилегија е да се игра под рефлектори. Времето е доста топло и во такви услови е тешко за игра. На претходните мечеви ни недостигаа навивачите, но се надеваме дека од утрешниот дуел ќе ја имаме нивната поддршка и сè ќе биде полесно“, додаде Крстевски.
Кај Шкендија за овој дуел ќе недостасуваат: голманот Бабукар Гаје, Рафаел Фреитас, Марко Ѓорѓиевски и Бојан Димоски, додека Анес Мелиќи сè уште е под суспензија поради црвениот картон. Во составот се враќа централниот дефанзивец Јован Манев.
Дербито се игра во Тренинг центарот „Петар Милошевски“ со почеток во 19:00 часот, а главен арбитар на мечот е Стојанче Трпчевски.
За разлика од Шкендија, актуелниот шампион ФК Вардар на лош начин го стартуваше новото првенство на Македонија. Забележа два порази во првите три кола, и остана без бодови на двете пресметки против конкурентите за титулата, Шкендија и Струга Трим Лум.
Ако се земе во предвид и европската елиминација од Рига, тогаш вардарци се во низа од три порази по ред, негативна серија што не им се случила многу долг период.
Од тој аспект, денешниот меч против Силекс е многу значаен за „црвено-црните“. Едноставно, мора да победат за да стават крај на лошата низа, но ќе мора да се изборат и со притисокот што го носи овој натпревар, дека мора да се освојат трите бода.
Атмосферата во тимот не е на највисоко ниво, поразите си го сторија своето, а се појави и клупска недисциплина кај одредени фудбалери. Со сето ова мораат да се справат Матија Мирков и Христијан Кировски, кои се во раководна улога откако замина аргентинскиот стратег Кристијан Фабијани.
Вардарци во изминатава недела беа фокусирани на работата, се обидоа да останат затворени и со тренинзи да ги надминат проблемите и да се подготват за новиот дуел со Силекс. Сите се во очекување, дали конечно шампионот и ќе одигра шампионски.
Натпреварот меѓу Вардар и Силекс е закажан за денеска, со почеток во 17 часот, на Националната Арена „Тодор Проески“ во Скопје.
