Во кругот на Клиничката болница „Др. Трифун Пановски“ – Битола изби пожар од запалена сува трева. Надлежните служби навремено и ефикасно интервенираа и го локализираа во најкраток можен рок. Нема материјална штета врз болничките објекти, ниту е загрозена безбедноста на пациентите и вработените.
-Министерството за здравство информира дека синоќа во кругот на Клиничката болница „Др. Трифун Пановски“ – Битола, изби пожар како резултат на запалена сува трева. Пожарот веднаш беше пријавен во Центарот за управување со кризи и противпожарната станица, по што надлежните служби навремено и ефикасно интервенираа и го локализираа во најкраток можен рок. Од страна на болницата беа преземени сите неопходни мерки за заштита и следење на ситуацијата. Нема никаква материјална штета врз болничките објекти, ниту е загрозена безбедноста на пациентите и вработените. Работата на болницата се одвива непречено, се вели во соопштението од Министерството за здравство.
Градоначалникот на Битола, Тони Коњановски, заедно со директорката на Клиничката болница „Д-р Трифун Пановски“, д-р Ненси Лозанче, излезе на терен по добиена информација за пожар на тревна површина во близина на Инфективното одделение.
Интервенцијата траела кратко и била целосно завршена без потреба од евакуација или дополнителни безбедносни мерки.
Министерството за здравство, велат оттаму, континуирано ја следи состојбата во сите јавни здравствени установи.
