Македонската музичка сцена остана без едно од своите најпрепознатливи имиња. По кратко боледување, на 66-годишна возраст почина поп-пејачот, композитор и текстописец Владо Јаневски.
Информацијата вечерва ја објавија повеќе домашни медиуми.
Владо Јаневски е роден на 27 ноември 1960 година во Скопје. Во текот на својата повеќедецениска кариера се вброи меѓу најзначајните автори и изведувачи на македонската поп-музика, оставајќи зад себе бројни безвременски хитови.
Има издадено шест студиски албуми, а негови песни како „Ако не те сакам“, „Евергрин“, „Дома си е дома“, „И тогаш некоја будала“, „Некогаш и негде“, „Црно тиквешко“, „Ова е наше Скопје“, „Еден бакнеж“ и многу други, остануваат дел од македонската музичка ризница.
Дипломирал на Филолошкиот факултет, на Катедрата за англиски јазик и литература. Во својата музичка кариера бил член на групите „Ластовица“, „Бон Тон“, „Тост Сендвич“ и „Фотомодел“, а настапувал на бројни домашни и меѓународни фестивали.
Во 1998 година испиша историја како прв официјален претставник на Македонија на Изборот за песна на Евровизија, каде во Бирмингем настапи со песната „Не зори зоро“.
Со својот препознатлив вокал, авторски печат и песни кои одбележаа неколку генерации, Владо Јаневски остави неизбришлива трага во македонската музичка култура.
