Бројот на жртвите од разорниот земјотрес од 7,7 степени што во петокот го погоди Мјанмар надмина 3.000. Стотици се водат како исчезнати, а се помала е надежта дека под урнатините има живи луѓе. Дополнителен проблем што оваа трагедија може да ја направи уште поголема се дождовите некарактеристични за сезоната кои ги прогнозираат метеоролозите за периодот од недела до 11 април. Тие претставуваат нов предизвик за спасувачите и хуманитарните работници.
-Доаѓа дожд, а има уште толку многу затрупани. А особено во Мандалеј, ако почне да врне, луѓето кои се под урнатините ќе се удават дури и ако преживеале до овој момент, изјави хуманитарец во Мјанмар за „Ројтерс“.
Според соопштение на амбасадата на Мјанмар во Јпонија досега имало 53 авионски достави на помош за Мјанмар, додека повеќе од 1.900 спасувачи пристигнале од 15 земји, вклучувајќи ги соседите, како и Кина, Индија и Русија.
Силниот земјотрес со епицентар во Мјанмар го почувствува регион со 28 милиони луѓе. Во главниот град наТајланд, Бангкок, се урна висококатница во изградба. Веќе цела недела со машини и букдожери спасувачите се обидуваат да искршат 100 тони бетон за да ги лоцираат 72-та работници кои ги затрупа планината од урнатини што остана од облакодерот.
Научниците сметаат дека земјотресот во Мјанмар бил од редок вид, таканаречен суперсмолкнувачки, во кој енергијата на руптурата се движи исклучително брзо низ земјата, интензивирајќи го уништувањето. Овој тип на руптура кај земјотресите „е еквивалент на суперсоничен млазен авион“, напиша Фредерик Тилман, сеизмолог во Центарот за геологија ГФЗ Хелмоц во Потсдам. Ова е прелиминарна работа, пишува „Нејчр“, но неколку истражувачки тимови веќе се согласуваат дека се работи за земјотрес со суперсмолкнување.
