Иранското свештеничко тело, Собрание на експерти, го назначило Моџтаба Хамнеи, син на убиениот врховен лидер Али Хамнеи, за нов водач на Исламската Република, објави „Иран интернешонал“ (Iran International), повикувајќи се на анонимни извори блиски до процесот, пренесе МИА.
Според нивните информации, изборот бил реализиран во забрзана постапка и под силен притисок, во услови на зголемени безбедносни ризици. Поради неодамнешните напади врз нивните објекти, членовите на Собранието заседавале онлајн. Со оваа одлука, иранското раководство, како што се наведува, настојува да обезбеди континуитет на власта и да го задржи постојниот политички курс.
Иако одлуката сè уште не е официјално потврдена, се очекува тоа да се случи по погребот на Хамнеи. Порталот посочува дека станува збор за потег мотивиран од безбедносни причини, што отвора прашања околу уставната процедура и легитимноста на изборот.
Во вакви околности, Исламска револуционерна гарда (ИРГК) се соочува со потребата истовремено да обезбеди стабилност и јавна поддршка. По атентатот, беше формиран привремен Совет за лидерство со задача да ги преземе надлежностите на врховниот водач и да го утврди неговиот наследник.
Секретарот на Врховниот совет за национална безбедност, Али Лариџани, го оцени убиството како „многу горчлив инцидент“, нагласувајќи дека иранската нација длабоко тагува поради случувањето.
Хамнеи, кој ја предводеше земјата 37 години, беше убиен во израелски воздушен напад врз Техеран. Планирано е да биде погребан покрај својот татко, во близина на светилиштето на имамот Реза во вториот по големина град во Иран, а точниот датум на погребот допрва треба да се утврди.
Во меѓувреме, САД и Израел извршија напади врз Иран, оценувајќи ги како „превентивни“ по пропаднатите преговори за нуклеарната програма. Како одговор, Техеран започна одмазднички напади врз израелски цели и објекти поврзани со САД во регионот на Блискиот Исток.
фото: епа
извор: нова македонија
