Од 1 јануари 2024 година, граѓаните на Косово ќе можат да патуваат во Шенген зоната без визи за краткотраен престој. Безвизното патување значи дека можете слободно да патувате во земјите од Шенген зоната, но нема да можете да работите, пренесува А2 Си Ен Ен.
Безвизниот режим им овозможува на граѓаните на Косово да патуваат без виза како туристи, да ги посетат пријателите или семејството, да учествуваат на културни или спортски настани, деловни состаноци, медицински третмани, семинари, конференции, работилници, летни школи и каква било слична активност. Европскиот парламент во април годинава ја одобри одлуката за либерализација на визите за граѓаните на Косово, со што беа завршени процедурите за одлучување за ова прашање. Одобрувањето во Европскиот парламент беше направено без гласање, бидејќи немаше опозиција.
Земји каде што ќе може да се патува без виза до 90 дена:
Европската комисија во одлуката за либерализација појасни дека и по либерализацијата на визите, имателите на косовски пасоши нема да можат да патуваат во Шпанија, земја која не ја признава ниту независноста на Косово, ниту нејзините пасоши. Државите вклучени во одлуката за либерализација на визите за косовците се: Австрија, Белгија, Бугарија, Хрватска, Кипар, Чешка, Данска, Естонија, Финска, Франција, Германија, Грција, Унгарија, Италија, Латвија, Литванија, Луксембург, Малта, Холандија, Полска, Португалија, Романија, Словачка, Словенија, Шведска, Швајцарија, Норвешка, Лихтенштајн и Исланд. Република Косово во моментов е единствената земја на Западен Балкан чии граѓани не можат слободно да се движат во Шенген зоната.
