Со голема радост и многу позитивна енергија ја започнавме новата 2026 година со посета на одделението за гинекологија и акушерство во Општата болница „Борка Талески“ – Прилеп, каде што го посетивме првороденото бебе во нашата општина.
Заедно со претседателката на Советот на општина Прилеп, директорот на болницата, претставници од Републичкиот совет за безбедност на сообраќајот на патиштата, како и со тимот на лекари и медицински сестри, на мајката Софија и на малиот Герасим им упативме искрени желби за добро здравје, среќно и безгрижно детство и долг живот исполнет со љубов.Во знак на внимание и поддршка, во името на Локалната самоуправа на општина Прилеп, на семејството им подаривме штедна книшка и пригодни подароци.
Овој убав и симболичен почеток на годината ни дава дополнителна мотивација и обврска уште повеќе и посветено да работиме на создавање подобри услови за младите семејства и за зголемување на наталитетот во нашата општина. Грижата за новите генерации е инвестиција во иднината на Прилеп и затоа ќе продолжиме со политики и мерки кои ќе го поддржуваат семејството, родителството и квалитетниот живот во нашиот град.
Со многу надеж и оптимизам, продолжуваме да градиме подобра сегашност и посигурна иднина за сите наши сограѓани.Среќна и бериќетна Нова година!
