Во насока на проактивна заштита на животната средина и јавниот интерес, Општинскиот инспекторат при Општина Битола започна со теренски дежурства надвор од редовното работно време. Првите контроли на терен веќе резултираа со над 30 утврдени прекршувања, најмногу во областа на градежништвото, јавната чистота и комуналните дејности.
Инспекторите констатирале неправилно постапување со градежен шут, комунален и друг вид отпад, што претставува директна закана за урбаниот изглед и животната средина. Дел од прекршителите добиле усни опомени и рок за отстранување на неправилностите, а во некои случаи веќе е започнато постапување.
Инспекциските служби постапиле и по пријави од граѓани, потврдувајќи ја важноста на граѓанската свест во зачувувањето на јавниот ред. За прекршувања кои не се во надлежност на инспекторатот, како улични трки, мопеди и прекумерна бучава, граѓаните се упатени да пријавуваат директно до СВР Битола.
Општината апелира до граѓаните да продолжат да пријавуваат неправилности и по работно време, на дежурниот телефонски број 075 388 797.
Со воведувањето на вонредните инспекциски контроли, Општина Битола ја потврдува својата заложба за одговорно управување, уредна урбана средина и чиста околина, создавајќи услови за побезбеден и поквалитетен живот на сите граѓани.
Фото: Општина Битола
