Силен земјотрес е регистриран меѓу островите Санторини и Аморгос по неколку дена континуирани потреси во оваа област. Поради стравувањата од голем земјотрес, на што предупредуваат грчките власти, повеќе од 11.000 луѓе веќе го напуштија Санторини, од кои 7.000 со траект, а 4.000 со авион.
Синоќешниот земјотрес имал јачина од 5,2 степени според Рихтеровата скала, со што е најсилен откако почнаа тресењата во морето пред неколку дена. Се случил на длабочина од пет километри.
Досега нема извештаи за штети на островот, но властите преземаат мерки од претпазливост, па се поставени и шатори на отворени простори. На Санторини доаѓаат милиони туристи секоја година, но сега не е сезона, па се евакуираат главно локални жители и работници.
Школите на Санторини, како и на соседните острови Анафи, Парос, Наксос и Миконос ќе бидат затворени до утре, по што одново ќе се разгледа ситуацијата.
Министерот за цивилна заштита Василис Кикилијас кажа дека на Санторини се распоредени пожарникари специјализирани за природни катастрофи, кучиња-трагачи и центри за мобилни операции.
„Државата им верува на научниците. Сме го правеле ова и во други кризни ситуации. Сите планови се спроведени“, изјави премиерот Кирјакос Мицотакис.
Санторини го добил сегашниот облик по една од најголемите вулкански ерупции во историјата, што се случила околу 1600 година пред нашата ера. Последната ерупција во областа била во 1950.
